Filomena Ramonelia Isenia mihó konosí komo Elia Isenia a nase 23 di ougùstùs di aña 1958.
Elia a nase na Kòrsou den e bario di Buena Vista, sin embargo Elia a pasa su infansia na Banda Abou, p’esei e ta bisa ku masha orguyo: “ Mucha di Banda Abou mi ta “

Elia ta yu mayó di e pareha Shon Mòl i Chela.

For di chikí tabatin indikashon ku e lo a bira un amante di músika i kanto.
E tabata un yuchi ku ta yora, stroba tur hende di drumi.

 Un biaha el a stòp di yora despues ku su mama a kanta: Dodo yuchi, yuchi no tin soño
Yuchi ta hasi maluku
Yuchi ta yora pòrnada
Dodo Eya, dodo Eya
Eya no tin soño

 Asta ta asina ku siendo yuchi, despues di un par di dia, el a kuminsá saka e zonido mmm mmm mmm;  samsam ku su mama ora e mama tabata kanta p’é pa e pega soño.

Elia tabata un mucha ku masha brio. Muestra di su brio komo mucha, ta e echo ku el a manda un karta pa su ídolo kantante di Venezuela Raquelita Castaño. Por sierto el haña un kontesta riba su karta.

Na edat di ocho aña Elia Isenia a skirbi su promé poesia i tambe su promé kantika.
Siendo un mucha di dies aña, e tabatin ya kaba interes pa bira un artista.
For di tempu ku e tabata bai skol básiko su tata shon Mòl Isenia a siñ’é toka kitara, kuarta, wiri i raspu. 
For di chikí  Elia tabatin masha interes pa tur loke ta historia, kultura, naturalesa i idioma, spesial pa loke ta trata provèrbio.

Elia tin masha amor pa su rais afrikano. Prueba di esei ta, ku el a duna tur su yunan nòmber afrikano.

Elia gusta siña mucha, kosnan di nos kultura, miéntras e mes ta tuma informashon serka informantenan di edat basta avansá. Por ehèmpel Martili Pieter, konosí komo bas di gueni, a siña Elia kanta kantika di trabou, for di tempu ku Elia tabatin ocho aña.
Elia su hòbinan ta, bishitá i sinta papia ku hende grandi, skirbi poesia, komponé kansion romántiko i kansion  folklóriko.

Elia ta un empleado di Kas di Kultura. Vários ta e aktividatnan kultural ku Elia a i ta desplegá komo profeshonal.

Kuater aña largu el a kordiná aktividatnan di e sektor intramural pa Siman di Kultura.
Institutonan intramural ta kaminda hende ku tin sierto nesesidat ta biba pa un tempu definí te na momentu ku nan haña solushon pa nan problema.
Algun ehèmpel di e institutonan akí ta: hòspital, klínika Capriles, kasnan di ansiano, G.O.G, kinderoord Brakkeput, prizòn, kasnan di hendenan ku desabilidat físiko òf mental.

Aktualmente Elia ta traha pa Kas di Kultura na Museo Tula, na lanthùis Kenepa. 

Promé ku Elia a bira eksitoso den festival di tumba, e tabata forma parti di un mariachi.
El a gana bastante premio entre otro ganadó apsoluto den festivalnan di mariachi.
Despues ku Elia Isenia a bira reina di tumba di karnaval di Kòrsou, e no a kanta mas den mariachi.

Elia Isenia a forma parti tambe di vários grupo di tambú. E por kantabu un bon tambú.

Ta Elia ta e persona ku a organisá e promé marcha di seú na Banda Abou. E marcha akí a sali di Wilibrordus i kaba na Jan Kok.

For di aña 1977 te  awor, Elia ta den farándula ku presentashon bibu pa públiko grandi.

1978 ta e promé aña ku Elia a partisipá na festival di tumba di karnaval di Kòrsou.

Na aña 1987  Elia a sali promé finalista di festival di tumba di Bándabou. Un biaha Elia a bira reina di tumba di karnaval di Banda Abou.

Despues di 20 aña ku  sekso maskulino tabata monopolisá e puesto di rei di tumba di karnaval di Kòrsou, Kòrsou a konosé na aña 1991 su promé reina di tumba di karnaval den persona di Elia Isenia.

Elia Isenia ta tambe e promé reina di tumba di Aruba-Antia. Na dos okashon tabatin e festival yamá Araba-Antia.  Partisipantenan na e festival akí tabata kompositornan di tumba di karnaval di Aruba, Boneiru i Kòrsou. Kada isla tabata delegá sinku kompositor. Lógiko e sinku mihónan.
E promé rei di tumba di e festival akí tabata Boy Dap.
Na 1991 Elia Isenia tabata e prome reina i e último ganadó di e festival akí.

Den e mésun aña un yu di Elia a sali ganadó apsoluto di e festival di tumba pa mucha ku un komposishon di Elia.
Elia Isenia tabata kompositor di e tumba ku e yu a gana kuné.

Aparte di a sali reina di tumba di Kòrsou na dos okashon, Elia a risibí den su trayektoria den festival di tumba vários premio.
Na aña 1996 i na aña 2007, Elia a bai ku e premio máksimo komo kompositor di tumba hubenil na respektivamente Boneiru i Aruba.